Akademio Internacia de la Sciencoj
Respondoj al la plej oftaj demandoj pri AIS Paderborn, 1996-05-31; München, 2000-10-11.

Kio estas AIS?

Kio AIS ne estas?

Kiel ekestis AIS?

Kiu subtenas la Akademion?

Kiel aligxi al AIS?

Kion faras AIS?

Kian stukturon havas AIS?

Kiel ricevi pli da informoj pri AIS?

La Akademio Internacia de la Sciencoj (AIS) San Marino estas la komuna agadpodio de fake elstaraj kaj lingvopolitike progresemaj sciencistoj el la tuta mondo, kiuj celas internacilingve pliefikigi la esploron kaj instruon de cxiuj sciencoj, kaj pliproksimigi cxi tiujn al la tekniko kaj arto, per plibonigo de la internacia komunikado kaj de la interfaka kunlaborado.

La Membroj (MdAIS), same kiel la asociitaj, efektivaj membroj (AMdAIS) kaj la adjunktoj (AdAIS) apartenas al diversaj nacioj, kontinentoj, rasoj, religioj, lingvoregionoj kaj politikaj kampoj. La politika pluralismo de la apartenantaro garantias la striktan politikan neuxtralecon de AIS, krom la komuna strebado al ties ununura politika celo: realigi en la scienca mondo iom post iom la bazan homan rajton je komunikado sen malhelpo cxu pro lingvobaroj cxu pro lingvodiskriminacio.

AIS ne estas limigita al kelkaj sciencoj (tial gxi nomigxas ne "akademio de sciencoj", sed "de la sciencoj"), sed gxi estas principe malfermita al cxiuj kampoj de sistema esploro, en kiuj celataj kaj imageblaj estas ekkonoj validaj sendepende de lingva, rasa, politika, religia kaj alia aparteneco. Tial la sekcioj kaj fakaro de AIS, kvankam spegulanta la klopodon komplete klasigi laux modernaj vidpunktoj la sciencaron, nek enhavas la teologian nek analogan doktrinon de ajna religio, sed ja la komparan religisciencon kaj historisciencojn de la religioj.

AIS estas libera institucio en la libera respubliko San Marino, malgranda euxropa respubliko). La Sxtato San Marino donas juran bazon kaj materian helpon, sed ne tusxas la liberecon de la scienca instruado kaj esploro.

Kvankam la Akademio Internacia de la Sciencoj (AIS) laux artikolo 4 de sia Statuto "zorgas speciale pri la aplikado de la Internacia Lingvo en la scienca komunikado kaj en kulturo", gxi nek volas nek povas anstatauxi la Akademion de Esperanto aux ajnan alian organizon de la Esperanto-movado.

Kvankam la ununura laborlingvo de la Senato, de la Gxenerala Asembleo kaj de la ekzamenkomisionoj de AIS estas ILo, la Internacia Lingvo de Doktoro Esperanto, la Statuto deklaras krome la kvar en la euxropa scienco plej tradiciricxajn etnajn lingvojn oficialaj lingvoj de AIS: la italan, francan, germanan kaj anglan lingvojn.

La gvidantoj de AIS estas konsciaj, ke la celoj de la Esperanto-movado transiras la celojn de la Akademio, kiuj ja estas limigitaj al la scienca kaj - duavice - teknika kaj arta laborkampoj. Tial AIS neniel celas konkurenci kun la Esperanto-movado aux altrudi ties kompletan kulturon kaj idealaron al la membroj kaj adjunktoj de la Akademio. Ne malmultaj akademianoj ja science uzadas la lingvon iniciitan 1887 de D-ro L. Zamenhof pro la precizeco, koncizeco, lernfacileco kaj neuxtraleco de cxi tiu plej sukcesa vivanta lingvo, sed ili ne sentas sin pro tio jam Esperantistoj.

Tiun sian ekstermovadecon AIS reliefigas respektante la kompromison proklamitan okaze de la solena malfermo de la "Unua Sanmarina Universitata Sesio" (SUS 1) la 28-an de decembro 1983: AIS uzas kiel nomon de la zamenhofa lingvo ne la psendonimon de la iniciatinto sed la originalan nomon "Internacia Lingvo" ofte mallongigite per "ILo".

Pro instigo de sciencistoj el la "Euxropa Klubo" la sanmarina ministrino pri klerigo kaj kulturo, Fausta Morganti, prezentis proponon pri starigo de la Akademio, kiun la "Congresso di Stato" per sia decido n-ro 58 favore prijugxis la 19-an de majo 1983. La iniciatgrupo AIS de Euxropa Klubo preparis la unuan Sanmarinan Universitatan Sesion (SUS 1), per kiu la scienca laboro de AIS fakte jam en 1983 komencigxis, kaj dum kiu establigxis la Internacia Scienca Kolegio (ISK) plenumanta cxi sciencan laboron.

La 13-an de septembro 1985 okazis la oficiala fondo de AIS per cxeadvokata subskribo de la Statuto, kaj la 31-an de oktobro 1985 ("1685 post la fondo de la Respubliko") la Granda kaj Gxenerala konsilio de la Respuliko de San Marino aprobis la kadrolegxon pri la universitata instruado kaj institucioj de altgrada klerigado, kiu ebligas nun la sxtatan agnoskon de la instrua laboro de AIS sen tusxi ties internaciecon kaj sendependecon.

Tiel eblas, ke AIS, aplikante detalan ekzamenregularon, agnoskas surbaze de prijugxo fare de internacia komitato studojn kompletigitajn cxe universitatoj an aliaj altlernejoj per havigo de internacia sciencista grado: "bakalauxro" (Bac.) post almenaux 2 - 3 jara studado, "magistro" (Mag.) post almenaux 2 postbakalauxraj studjaroj, "doktoro" (Dr.) kaj "habilita doktoro" (Dr. habil.) pro posta esplorlaboro. Tiuj titoloj estas akireblaj ankaux originale per studado kaj ekzamenigxo okazante grandparte cxe docentoj de AIS.

• Aldone al la jura kaj materia subtenoj, kiujn AIS gxuas fare de la Respubliko de San Marino,

• gxin subtenas finance la "Subtena Sektoro" - al kiu la Statuto de AIS koncesias certan memadministradon kaj al kiu apartens momente (majo 1996) 115 personaj kaj 9 kolektivaj subtenaj membroj -

• kaj intelekte la neformala Internacia Scienca Kolegio (ISK), el kiu AIS aligas siajn efektivajn membrojn kaj adjunktojn, kaj invitas siajn prelegantojn. Al ISK aligxis jam pli ol 1000 sciencistoj el 66 landoj, de kiuj 449 el 44 landoj ankoraux estas aktivaj.

Al AIS apartenas – do estas 'AISanoj' – nur la Subtenaj Membroj (SMdAIS) kaj la de la senato nomumitaj ISKanoj (same kiel ITKanoj kaj IAKanoj). Bonvenas se ISKano samtempe ankaux estas Subtena Membro!

Aligxi kiel Subtena Membro:

• Se vi jam estas ISKano
  • sendu neformalan leteron al la Subtena Sektoro de AIS
  • pagu nur 1 AKU jare, la simbola jarkotizo kiel ISKano forfalas
• Se vi ne jam estas ISKano,
  • sendu neformalan leteron al la Subtena Sektoro de AIS
  • necesas aprobo de la Gxenerala Asembleo de la Subtena Sektoro kaj de la Senato de AIS
  • pagendas 1 AKU jare
• Se vi volas "farigxi" kolektiva subtena membro,
  • sendu neformalan leteron al la Subtena Sektoro de AIS
  • necesas pozitiva decido de la estraro de la Subtena Sektoro
  • pagendas 1 AKU jare

Aligxi al ISK:

• Per Pripersona Informilo sendenda al la Prezidanta Sekretariejo
• Pagenda jarkotizo estas 0,1 AKU, antauxpagenda por minimume 3 jaroj, do 0,3 AKU
• Estas invitita aligxi al ISK cxiu sciencisto de ajna fako, kiu
  • aprobas la principon de la sennacieco de sciencoj kaj la celon de AIS redukti la lingvo-diskriminacion en la internacia scienca kunlaborado,
  • sukcese finis minimume dujaran universitatnivelan studon (ekz. per "diploma", la "Vordiplom", la "bachelor"-grado, la ingxenierekzameno, la ekzameno de elementlerneja instruisto ktp.), aux kiu akiris nacinivele pli altan sciencan rangon,
  • scipovas almenaux lege kompreni facilan tekston en ILo.

Aligxi al ITK:

• ankoraux ne klaras :(
• Estas invitita aligxi al ITK, kiu
  • jam plurajn jarojn lernis kaj praktikas labori en teknika fako (maqin-, dom- aux stratkonstruado, elektrotekniko, medicino, pedagogio, komunikado, administrado ktp.)

Aligxi al IAK:

• ankoraux ne klaras :(
• Estas invitita aligxi al IAK, kiu
  • jam plurajn jarojn lernis kaj praktikas labori en arta fako (muziko, pentrado, danco, beletro, teatro ktp.)

AIS plenumas

• tipe akademiajn taskojn
  • okazigo de konferencoj,
  • honorigoj de elstaraj sciencistoj, artistoj kaj teknikistoj,
  • aperigo de publikajxoj;
• tipe universitatajn taskojn
  • realigi kursojn kaj
  • realigi ekzamenojn.

AIS regule okazigas

• universitatajn sesiojn kun
  • kursoj,
  • prelegserioj,
  • debutprelegoj,
  • liberaj prelegoj,
  • kandidatprelegoj,
  • ekzamenoj,
  • kunsidoj de la organoj de AIS,
  • kultura kadra programo;
• la Sanmarinajn Universitatajn Sesiojn (SUS) nur en la Respubliko de San Marino mem,
• helpe de siaj filioj, informcentroj kaj kunlaborantaj universitatoj Sanmarinecajn Universitatajn Sesiojn (SUS)ankaux en aliaj landoj, ekz. en Bialystok (Pollando), Sibiu-Hermannstadt (Rumanio), Prago (Cxehxio), Nitra (Slovakio), Debrecen (Hungario), Moskvo kaj St.Petersburgo (Rusio), Libera Universitato Aristoteles Ateno (Greklando). Cento da universitatoj, kie laboras AIS membroj, estas tiel pere de ili reprezentataj cxe AIS.

AIS dispartigxas en kvar Sektoroj:

• la Scienca Sektoro (SciS)
• la Teknika Sektoro (TeS)
• la Arta Sektoro (ArS)
• la Subtena Sektoro (SubS)

La Scienca Sektoro estas dividita en ses sekciojn, gvidatajn de dekanoj.

• Sekcio 1: kibernetiko
• Sekcio 2: humanistiko
• Sekcio 3: struktursciencoj
• Sekcio 4: filozofio
• Sekcio 5: natursciencoj
• Sekcio 6: morfosciencoj

La apartenantoj de la SciS

• havas en rajtoj kaj devoj diversajn gradojn. En majo 1996
  • 42 plenrajtaj membroj (MdAIS) nome la ordaj profesoroj (OProf),
  • 33 asociitaj membroj (AMdAIS), asociitaj profesoroj (AProf) aux plenrajtaj docentoj (PDoc),
  • 130 adjunktoj (AdAIS), asociitaj docentoj (ADoc) aux adjunktoj sciencaj (ASci)
• laboras en la ses sekcioj de la Scienca Sektoro.

• Detalan dokumentaron pri la evoluo, statuto kaj regularo de AIS enhavas la de AIS publikigitaj "Ekesto kaj celoj de la Akademio Internacia de al Sciencoj San Marino"
• La statuto kaj cxiuj regularoj trovigxas en "La regularoj de AIS"
• Decidprotokolojn de la organoj de AIS publikas la kvaronjara, kvarlingva revuo "grkg/Humankybernetik", kiun subtenaj membroj de AIS ricevas senpage, aliaj povas aboni.
• La prelegtekstojn kaj sciencajn artikolojn alportas la serio "Acta Sanmarinensia"
• La detalajn informojn pri membraro kaj strukturo oni trovas en "Internacia Sciencista Dokumentaro"
• AIS krome publikigas sciencajn librojn de siaj membroj kaj havigas la instruprogramojn helpe de sia instruteko
• Specialaj informoj estas haveblaj cxe la dekanoj kaj cxe la Senata Sekretariejo.